Abstract:
වර්තමානයේ දී ස්වාභාවික සම්පත් අතර ඉහළ ම ඉල්ලුමක් භූමිය කෙරෙහි ඇත්තේ එය සීමාකාරී සම්පතක් නිසා ය. ගෝලීය ජනගහනය ශීඝ්‍රයෙන් වර්ධනය වීමත් සමඟ භූමිය කෙරෙහි ප්‍රබල බලපෑමක් එල්ල වී ඇත. ජනගහන වර්ධනයට සාපේක්ෂව භූමිය ප්‍රසාරණයවීමක් සිදු නොවීම මෙහි දී පවතින ගැටලුව වේ. මෑත කාලයේ සංවර්ධනය වෙමින් පවතින රටවල නාගරික ප්‍රදේශ ආශ්‍රිත ව වැඩි ජන සංඛ්‍යාවක් ඒකරාශිවීම හඳුනාගත හැකි ය. එයට ප්‍රධානතම හේතුව මෙවැනි රටවල්වල ප්‍රාදේශීය සංවර්ධනය දුර්වල මට්ටමක පැවතීමයි. එවැනි රටක් ලෙස ශ්‍රී ලංකාවේ ජනගහන වර්ධනය හා නාගරික ජන සංකේන්ද්‍රණය වීමත් සමග දක්නට ලැබෙන ගැටලු හා අභියෝගයන් රැසක් ඇත. මේ තත්ත්වය පැහැදිලි ලෙස දක්නට ලැබෙන නගරයක් ලෙස හොරණ හඳුන්වා දිය හැකි ය. කළුතර හා කොළඹ යන ප්‍රධාන නගරවලට අතරමැදිව පිහිටි මංසන්ධි නගරයක් ලෙස මෙම නගරය වැදගත් වේ. හොරණ කලාපය තුළ වර්තමානයේ දී සැලකිය යුතු ආකාරයෙන් නාගරිකරණය වීම හේතුවෙන් දෛනික සංචරණය වර්ධනය වී ඇත. මෙම අධ්‍යයනයේ දී අධ්‍යයන අරමුණු ලෙස ජන සංඛ්‍යාව වැඩි වශයෙන් නාගරික කලාප වෙත සංකේන්ද්‍රණය වන්නේ කුමන හේතු නිසා ද? යන්න අධ්‍යයනය කිරීමත්, ජන සංඛ්‍යාව වර්ධනය වීම නිසා නාගරික කේන්ද්‍රයන් තුළ ගොඩනැඟෙන්නා වූ අභියෝග හා ගැටලු කවරේ ද? යන්න අධ්‍යයනය කිරීමත්, එම ගැටලු හා අභියෝග හොරණ නගරයේ භෞතික හා මානව සාධක කෙරෙහි කුමන ආකාරයෙන් බලපෑම් කරන්නේ ද යන්න හඳුනාගැනීමත් සිදු වෙයි.
